يا باب يا مقفول... إمتى الدخول
صبرت ياما واللي يصبر ينول
دقيت سنين... والرد يرجع لي: مين؟
لو كنت عارف مين أنا كنت أقول
عجبي!!!
أنا كل يوم أسمع.... فلان عذبوه
أسرح في بغداد والجزاير واتوه
ما أعجبش م اللي يطيق بجسمه العذاب
واعجب من اللي يطيق يعذب أخوه
عجبي!!!
كرباج سعاده وقلبي منه انجلد
رمح كأنه حصان ولف البلد
ورجع لي نص الليل وسألني.. ليه
خجلان تقول إنك سعيد يا ولد
عجبي!!!
يا مشرط الجراح أمانة علـــــــــــيك
وإنت ف حشايا تبص من حواليــك
فيه نقطة سوده في قلبي بدأت تبان
شيلها كمان.. والفضل يرجع إليك
عجبي!!!
لا تجبر الإنسان ولا تخيّره
يكفيه ما فيه من عقل بيحيّره
اللي النهارده بيطلبه ويشتهيه
هو اللي بكره ح يشتهي يغيّره
عجبي!!